Mshairikasti The Poetcast

Natukaye Matangani

October 30, 2020 Mohammed AlGhassani
Mshairikasti The Poetcast
Natukaye Matangani
Show Notes

Tutandikeni matanga, tukusanyane wafiwa 

Tuwalilie wahanga, roho changa zilotwawa 

Walokatwa kwa mapanga, na risasi za vifuwa 

Wa Nungwi na Kangangani, wa Tumbe na Madaniwa 

Walofatwa majumbani, vichwa vikafumuliwa 

Walotupwa majiani, hali washanyofolewa 

Tulilie mashahidi, ndugu walodhulumiwa 

Dhuluma iloshitadi, ilovitanda visiwa 

Itendwayo makusudi, lengo la kutukomowa 

Tukaye tuomboleze, makiwa haya makiwa 

Machozi tumiminize, kwa waliokashifiwa

Tuliye tusinyamaze, tuliye kwa kutambuwa -

Kwa kutambuwa ambacho, chatugeuza wafiwa 

Wapendwa kitupokacho, na mwetu kunajisiwa - 

Ni hichi tuaminicho, cha uhuru wa visiwa 

Kwa kutambuwa hatuna, wa kutuhani wakiwa 

Si Wazungu, si Wachina, wala si Bara Asia

Basi atosha Rabbana, Atosha kutegemewa 

Bonn

30 Oktoba 2020